Kātoanga “USA TONGA DAY” ‘a e kāinga Tonga ‘i Seattle, Washington ne fakahoko ‘i he fakaʻosinga ʻo e uike kuo’osí (2 – 4 ‘Aokosi), ne kau atu ki ai e toko 4 nima meaʻa mei Tonga ni tataki atu ‘e he ‘ofisiale mei he Potungāue Fefakatauʻakí mo e Langa Fakalakalaka Faka’ekonōmiká ke fakaʻaliʻali mo fakamāketi atu e ngaahi koloa fakatongá pea mo kumi ha ngaahi faingamalie fakamaketi ma‘ae ngaahi koloa fakamea‘a.

Ko e polokalama ni òku ne fakatahataha mai ʻa e kāinga Tonga mei he ngaahi komiunitī ‘i Seattle, Salt Lake pea mo Portland ke kātoanga’i e USA TONGA DAY hili ha ngaahi ta’u lahi. Kuo lava atu e polokalama ‘ì Seattle kae hoko atu ki he polokalama tatau ‘i Salt Lake he ‘aho 8-10 ‘Aokosi 2024 pea faka‘osi ki Portland ‘i he ‘aho 16-17 ‘Aokosi 2024.

Ko e taumu’a ke ako mo fakatolonga e ngaahi tala mo e ʻulungaanga fakafonuá ki he fānau Tonga tupu hake ‘i ‘Ameliká pea mo pukepuke ‘etau ngaahi koloa tuku fakaholo. Ne fakahoko ai ngaahi pō hiva, ngaahi faiva mo e hiva fakatonga, pea kau atu ai ‘a e Potungāue mo e niʻihi kau ngāue nimameaʻa mei Tongá ni ke fakaʻaliʻali e ngaahi koloa fakafonuá. Fakaʻofoʻofa ‘aupito ngaahi fala, ngatu, fihu fatufā, ta’ovala, kiekie, ngaahi kato lalanga, pehē ki he ngaahi siueli ‘i he kalasi kehekehe.

Ko e fakaafe ia kuo tali ke kau atu ‘a Tonga ni ki he polokalama pea hoko ia ko e faingāmalie ki he fekumi māketi ‘a e Potungāue ki he hū atu ko ia ʻo e ngaahi koloa ngaohi fakalotofonuá (TONGAN MADE) ki tuʻapuleʻangá.

‘I he kātoanga FESTPAC 2024 naʻe fakahoko ʻi Sune ki Hawaiʻi naʻe kau atu foki ki ai e Potungāué ke fakaʻaliʻali e ngaahi koloa fakamea’á pea na’e lava ai ke fai e talanoa mo e Polynesian Cultural Centre kau ia he ngaahi senitā manakoa taha ki he folau ‘eve’evá ‘i māmāni ke fokotuʻu ai ha maketi ‘a Tongá ni ke hū atu ki ai e ngaahi koloa fakameaʻá pea ‘oku kei fakahoko ‘a e ngāue ki ai.