Mei he uike kuoʻosí (‘aho 7 – 10 ‘Aokosi), naʻe hoko atu hono kātoangaʻi ʻo e USA – Tonga Day ʻe he ngaahi komiunitī Tonga ʻi he vāhenga Salt Lake City, Utah pea naʻe kau atu ki ai ʻa e kau ngāue fakameaʻa ʻe toko 5 mei Tongá ni ʻo fakaʻaliʻali mo māketi atu e ngaahi ngāue fakameaʻa kehekehe ne nau lava atu moia mei Tongá ni ki he kātoangá ni.

Neongo e taimi nounou e polokalama USA Tonga Day, naʻe malava ke fakatau ʻe he komiunitī Tonga ʻi he vāhenga Salt Lake City ʻa e ngaahi koloa fakameaʻa ne lava atu mo e kau ngaue fakameaʻa ʻo ʻosi kimuʻa pea nau foki mai.

Ne talitali lelei pea lava ke fakapapauʻi ʻi he ngaʻuta tokolahi e kāinga Tonga ʻi he kātoangá ni ʻa e fāingamālie ki he kau ngāue fakameaʻá ha ngaahi maketi foʻou ki he ngaahi koloa ʻo Tonga ʻi he tuʻunga fakavahaʻapuleʻanga. Ko e ngaahi maketi foʻou koʻeni ʻoku kau ki ai e ngaahi falekoloa siueli ki he mabe pearl mei Vavaʻu mo e ngaahi falekoloa ngaue fakameaʻa kehekehe mei he Pasifiki.

Naʻe kamata aipe mo hono order e ngaahi koloa ke teuteuʻi ke hu atu ki Salt Lake Utah ʻi ʻOkatopa 2024. Ko e taʻu ʻaki ʻeni hono 27 hono kei pukepuke ʻe he komiunitī Tonga vāhenga Salt Lake City, Utah ʻa e kātoanga fakataʻu ko ‘eni.

‘Oku ‘amanaki ke hoko atu hono kātoangaʻi ʻo e USA – Tonga Day ki he komiunitī Tonga ʻi he vahenga Portland Oregon pea ʻoku ʻosi maau atu e timi ngāue fakameaʻa ʻe toko 4 mo e ngaahi koloa fakameaʻa, ngaahi koloa fakatonga ke fakaʻaliʻali mo fakatau atu ai ʻi he uiké ni ʻo kamata he ʻaho 16 ki he 17 ʻAokosi.