SUVA, Fisi: Naʻe fakaʻosi ʻi he ʻaho ni ʻa e fakataha lahi ʻaho e 4 ʻa e ngaahi fonua memipa ʻe 11 ʻo e Kautaha Ngāue Fakavahaʻapuleʻanga ʻa e Kakai (International Labour Organization – ILO) mo e ngaahi fonua kehe pe mei he Pasifiki, ʻi he fengāueʻaki ʻa e ILO mo e Kautaha ʻa e Ngaahi Fonua Pasifiki (Pacific Islands Forum Secretariat – PIFS). Naʻe fakahoko ʻa e fakataha ni mei he ʻaho Tusite 23 ʻo ʻEpeleli 2024 ʻi he PIFS ʻi Suva, Fisi.

Ko e fakataha ni ke talatalanoa ʻa e ngaahi sino ngāue ʻe 3 ʻoku felaveʻi tonu mo e ngāue (tripartite) – puleʻanga, kautaha ngāueʻanga mo e kautaha kau ngāue, ki ha founga ke fakalakalakaʻi ai ʻa e ʻātakai ngāue ʻi he ngaahi fonua ʻo e Pasifiki, pea fakafehokotaki ʻa e ʻasenita ʻo e ngāue lelei (decent work agenda) mo e palani ngāue ʻa e Pasifikí ki he 2050 (2050 Strategy for Blue Pacific Continent).

Naʻe fakafofongaʻi atu ʻa e puleʻanga Tonga ʻe he ʻEiki Minisita ʻo e Potungāue Fefakatauʻakí mo e Langa Fakalakalaka, mo e Takimamata, Dr. Viliami Uasike Latu, mo e ongo ʻofisa maʻolunga mei he Vaʻa Ngāue ʻo e Potungāue, Kolotia Fotu pea mo Sione Faleafa. Mei he tafaʻaki ʻa e kautaha ngāueʻangá, naʻe fakafofonga mei ai ʻa Sam Vea, pea mo e Mele ʻAmanaki mei he ngaahi kautaha ʻa e kau ngāue.

Lolotonga ʻa e fakataha, naʻe fili ai ʻa e ʻEiki Minisita ke sea ʻi he fakatahaʻanga ʻa e ngaahi puleʻanga ʻo e Pasifiki, pea naʻe to e kau foki mo Tonga ki he ngaahi penolo ʻi he kaveinga kehekehe pe lolotonga ʻa e lele ʻa e fakataha ni. ʻI he taha ʻo ʻene ngaahi meʻa lolotonga ʻa e fakataha, naʻe pehe ʻe he ʻEiki Minista, “ʻOku fiemaʻu ke fehokotaki lelei ʻa e akó, ako ngāué mo e fiemaʻu ʻa e sekitoa ngāué. ʻA ia ʻoku fiemaʻu ai ke fakahoko ʻa e ngaahi polokalama fakaʻaiʻai ʻo e toʻutupú ke fakalakalakaʻi honau talēniti ngāue he tafaʻaki kehekehe, pea ke ngāue fakataha ʻa e Puleʻangá, ngaahi kautaha ngāueʻangá mo e kau ngāué, ke fakalakalakaʻi ʻa e ʻātakai ngāue ʻi Tonga.”

Naʻe fakaava ʻa e fakataha ʻi he efiafi Monite 22 ʻo ʻEpeleli 2024 ʻe he Palesiteni ʻo Fisi, Ratu Wiliame Maivalili Katonivere, ʻo ne poupou ai pe ki he mahuʻinga ʻo e fengāueʻaki ʻo e ngaahi kupu felaveʻi- “I heʻetau fengāueʻaki fakatahá ʻe malava ke fokotuʻu ha ʻātakai ʻoku fakamahuʻingaʻi ai e tokotaha ngāue kotoa pea aʻusia e ngāue leleí.”

Ko e ola maʻolunga ne aʻu ki ai ʻa e fakataha ni ko e fakamoʻoni ʻa e ILO mo e PIFS ki he aleapau ngāue (MOU) ke na fengāueʻaki vaohi ke teke ʻa e ngaahi taumuʻa ngāue ʻa e ngāue lelei mo tokoniʻi ʻa e ngaahi fonua Pasifiki ke fakalakalalakaʻi ʻa e ʻatakai ngāue fakafonua, pea mo e Pasifiki.

Naʻe lava mai ʻa e kau ngāue tokolahi ʻa e ILO mei ongo ʻofisi ʻo e kautaha ʻi Siniva, Bangkok, pea mo Fisi pe, pea naʻe taki mai ai ʻa e Tokoni Talekita Pule ʻo e ILO ka ko e Talekita Pule ia ʻo ʻEsia mo e Pasifiki, Ms. Chihoko Asada-Miyakawa. Naʻe talitali lelei ai ʻe he Tokoni Sekelitali Pule ʻo e PIFS, Mr. Esala Nayasi, ʻa e kau ngāue ʻa e ILO mo e ngaahi fakafofonga ʻo e Pasifiki ki he fakataha.